کابل ټریبیون (کېټي) د امریکا د جنګ وزارت د کابل په هوايي ډګر کې د ۲۰۲۱ کال د ځانمرګي برید په اړه د روانې بیاکتنې پر مهال داسې محرم اسناد موندلي چې د چارواکو په وینا، تر دې مخکې نه وو برڅېړه شوي او نه هم په اړوندو څېړنو کې وړاندې شوي وو.
شان پارنیل، چې د برید د ځانګړې بیاکتنې مشري کوي، د چهارشنبې په ورځ د پېښې د پنځمې کلیزې په مناسبت په یوه ټولنیزه رسنۍ کې وویل چې د هغه ټیم په دې وروستیو کې «خورا مهم محرم اسناد» موندلي دي.
د پارنیل په وینا، دغه اسناد په سیفونو کې ساتل شوي وو او داسې ځای کې اېښودل شوي وو چې د موندلو امکان یې کم و. هغه وویل، د ځانګړې بیاکتنې پلاوي د اسنادو له ارزونې وروسته داسې پوښتنې راپورته شوې چې ولې دغه مواد مخکې نه وو وړاندې شوي.
پارنیل د اسنادو د منځپانګې له بیانولو ډډه وکړه او ویې ویل چې د څېړنې تر بشپړېدو مخکې به د دوی جزئیات نه خپروي.
هغه وویل: «موږ به شواهد هر ځای او هر چا ته چې رسېږي، تعقیب کړو. موږ به نیمګړي یا د منلو وړ اسانه ځوابونه ونه منو.»
د کابل هوايي ډګر د «ابي ګېټ» دروازې ته څېرمه د ۲۰۲۱ کال د اګسټ په ۲۶مه په ځانمرګي برید کې ۱۳ امریکايي سرتېري او شاوخوا ۱۷۰ افغان ملکي وګړي ووژل شول.
د برید د ځانګړې بیاکتنې پلاوی تېر کال د امریکا د جګړې وزیر پیټ هېګسېټ له خوا جوړ شو او پارنیل، چې د افغانستان د جګړې پخوانی سرتېری دی، د دې پلاوي مشري ته وټاکل شو.
هېګسېټ د برید د څلورمې کلیزې پر مهال د وژل شویو امریکايي سرتېرو له کورنیو سره د لیدنې پر مهال ویلي وو چې امریکايي ولس د دې پېښې په اړه د بشپړو ځوابونو حق لري او پوځ باید د پېښې په اړه ځواب ووايي.
پارنیل ویلي چې د ځانګړې بیاکتنې د پلاوي غړي په افغانستان کې د پوځي خدمت پراخه تجربه لري. د هغه په وینا، د پلاوي غړو د سرتېرو مشري کړې، په جګړو کې ښکېل شوي او خپل پوځي ملګري یې له لاسه ورکړي دي.
د دې نوې بیاکتنې تر څنګ، د امریکا مرکزي قوماندانۍ په اپرېل ۲۰۲۴ کې د برید په اړه یوه تکمیلي څېړنه هم ترسره کړې وه. په هغې څېړنه کې د پوځ پخوانۍ پلټنه بیا وارزول شوه او پایله یې دا وه چې بریدګر د داعش خراسان څانګې غړی و.
د ۲۰۲۴ کال په بیاکتنه کې هم د پوځ د لومړنۍ څېړنې موندنې تایید شوې او ویل شوي وو چې د برید مخنیوی په تاکتیکي کچه ممکن نه و.
پارنیل د نوې بیاکتنې د بشپړېدو لپاره کومه مشخصه نېټه نه ده ټاکلې، خو ویلي یې دي چې څېړونکي به د شواهدو ارزونې ته دوام ورکړي.
هغه وویل: «امریکايي ولس او هغه کورنۍ چې هر څه یې قرباني کړي، د دې بشپړ انځور مستحق دي چې څه وشول او ولې دغه پرېکړې وشوې، او موږ به دا بشپړ انځور هغوی ته وړاندې کړو.»
