کابلټرېبیون-- د پاکستان د بهرنیو چارو وزارت ویاند وايي، له طالبانو سره د اسلاماباد په خبرو او اړیکو کې هر ډول پرمختګ د وسلهوالو ډلو پر وړاندې د طالبانو په عملي اقداماتو پورې تړلی دی.
د پاکستان د بهرنیو چارو وزارت ویاند طاهر اندرابي د پنجشنبې په ورځ
په یوه خبري غونډه کې وویل، طالبان باید د دوحې د تړون په ګډون خپلو نړیوالو ژمنو
ته درناوی وکړي او اجازه ورنه کړي چې د افغانستان خاوره د پاکستان پر ضد وکارول شي.
اندرابي وویل: «کابل باید د دوحې د چوکاټ په ګډون پر خپلو نړیوالو ژمنو عمل وکړي او ډاډ ترلاسه کړي چې د افغانستان خاوره د
پاکستان پر ضد د دښمنو نیابتي ډلو، په ځانګړي ډول تحریک طالبان پاکستان او د
بلوچستان د ازادۍ پوځ، له خوا نه کارول کېږي.»
د پاکستان د بهرنیو چارو وزارت ویاند زیاته کړه چې اسلاماباد لا هم
له افغان لوري سره د «اداري همغږۍ» لپاره چمتو دی، خو په دې شرط چې دغه همکاري د
ترهګرۍ پر وړاندې د مبارزې او د سرحدونو د اغېزمن مدیریت په برخه کې د مشخصو او د
تایید وړ اقداماتو سبب شي.
هغه ټینګار وکړ: «اسلاماباد د اداري همغږۍ لپاره چمتو دی، په دې شرط
چې دا بهیر د ترهګرۍ پر وړاندې د مبارزې او د سرحدونو د اغېزمن مدیریت په برخه کې
مشخصو او د تایید وړ اقداماتو ته لار هواره کړي.»
پاکستان په وروستیو کلونو کې څو ځله له طالبانو غوښتي چې په افغانستان
کې د وسلهوالو ډلو هغه پټنځایونه له منځه یوسي چې د اسلاماباد په وینا، د
پاکستان پر ضد د بریدونو لپاره ترې کار اخیستل کېږي.
پاکستاني چارواکي ادعا کوي چې د دغو پټنځایونو د له منځه وړلو غوښتنې
یې تر اوسه په عملي توګه نه دي منل شوې.
طالبانو بیا په وار وار د پاکستان پر ضد د وسلهوالو ډلو د ملاتړ
تورونه رد کړي او ویلي یې دي چې هېڅ ډلې ته به اجازه ورنه کړي چې د افغانستان
خاوره د نورو هېوادونو پر ضد وکاروي.
