کابلټربیون – په بغلان ولایت کې د طالبانو امنیه قومانداني وايي، ځواکونو یې د دغه ولایت په نهرین او خوست ولسوالیو کې د عملیاتو پر مهال د مقاومت جبهې څلور غړي وژلي دي.
دغې قوماندانۍ د جمعې په ورځ، د وږي په شپږمه، په یوه خبرپاڼه کې ویلي
چې دوه تنه یې د نهرین ولسوالۍ د کهګدای سیمې په چهارسای سیمه کې د شپې په عملیاتو
کې وژلي دي.
د طالبانو په وینا، په وژل شویو کسانو کې یو د «خرابات» په نوم مشهور
شمس او بل د «بابه» په نوم قوماندان دی.
طالبان وايي، شمس په نهرین، بورکه او جلګې کې د مقاومت جبهې پوځي
مسوول و او بابه په نهرین ولسوالۍ کې د دې جبهې پوځي مسوولیت درلود.
د طالبانو اړوندو رسنیو راپور ورکړی چې شمس د قوماندان صمد کهګدای او
قوماندان ظفر تر وژل کېدو وروسته، په یادو سیمو کې د ملي مقاومت جبهې د پوځي مسوول
په توګه ټاکل شوی و.
د طالبانو په خبرپاڼه کې ادعا شوې چې په عملیاتو کې یو شمېر وسلې او
مهمات او یوه د شپې لید وسیله هم د دوی ځواکونو ترلاسه کړې ده.
د طالبانو د بغلان امنیه قومانداني هم وايي چې د خوست ولسوالۍ په
فرغامبول دره کې د یوه بل عملیات پر مهال د مقاومت جبهې دوه نور غړي وژل شوي دي.
د طالبانو په وینا، دغه کسان د پوځي عملیاتو د پلان جوړولو پر مهال په
نښه شوي دي.
په همدې حال کې، خپاره شوي انځورونه ښيي چې طالبان د بغلان د خوست
ولسوالۍ په دوآبي بازار کې دوه جسدونه نندارې ته وړاندې کوي.
تر اوسه د مقاومت جبهې له لوري د طالبانو د دغو ادعاوو په اړه رسمي
غبرګون نه دی خپور شوی.
