کابلټریبیون (کېټي)-- د ایران د مازندران ولایت په بابلسر ښار کې درې افغان وګړي د کسپین سمندرګي په اوبو کې د لامبو پر مهال ډوب شوي دي. یو بل افغان وګړی له پېښې ژوندی ژغورل شوی دی.
د پېښې ځایي چارواکي وايي، دغه پېښه د جمعې په شپه، د وږي په شپږمه،
شاوخوا ۱۰:۳۰ بجې د بابلسر ښار د «سنګچین» اسکله په ساحه کې شوې ده.
د بابلسر د ژغورنې او غوطهورۍ د ادارې مشر مهدي حبیباللهپور ویلي،
څلورو افغان وګړو د لامبو لپاره د کسپین سمندرګي اوبو ته ننوتلي وو.
د نوموړي په وینا، له دغو کسانو څخه یو یې د خپل فزیکي حالت له امله
له خپلو درېیو ملګرو شاته پاتې شوی و. هغه وروسته ولیدل چې ملګري یې نور په سیمه
کې نشته، له اوبو راووت او د ژغورنې ادارې ته یې د پېښې خبر ورکړ.
د بابلسر د بیړنیو خدماتو مسوول سید کاظم جلیلیان ویلي، یو له څلورو
افغانانو څخه په لومړیو شېبو کې ژغورل شوی او د پاتې درېیو کسانو د موندلو لپاره د
لټون عملیات پیل شوي وو.
د لومړي قرباني جسد د شنبې په ماښام د بابلسر د سنګچین په ساحل کې
وموندل شو. د دویم افغان جسد هم د شنبې په شپه د اسکله ته څېرمه په هغه سیمه کې
وموندل شو چې لامبو پکې منع ده.
د درېیم کس د موندلو لپاره د ژغورنې او لټون عملیات د یکشنبې په ورځ
هم دوام وکړ. د څو ساعتونو لټون وروسته د هغه جسد د بابلسر د «عليآباد میر» سیمې
په ساحل کې وموندل شو.
ایراني چارواکو تر اوسه د وژل شویو افغانانو نومونه، عمرونه او د اصلي
استوګنې سیمې نه دي په ډاګه کړي. چارواکو یوازې ویلي چې درې واړه افغان وګړي وو او
له یو بل سره یو ځای د لامبو لپاره سمندر ته تللي وو.
دا په وروستیو میاشتو کې د ایران د مازندران ولایت په ساحلونو کې د
افغان وګړو د ډوبېدو دویمه مرګونې پېښه ده.
