کابلټریبیون (کېټي)-- د پاکستان، سعودي عربستان او ترکیې لوړپوړي چارواکي به د دوشنبې په ورځ په استانبول کې د درېیو هېوادونو د ګډ دفاعي تړون د لومړنۍ کمېټې په غونډه کې ګډون وکړي.
پاکستانۍ «ډان» ورځپاڼې د ترکیې د بهرنیو چارو وزارت د یوه چارواکي په
حواله راپور ورکړی چې د درېیو هېوادونو د بهرنیو چارو او دفاع وزیران او د وسلهوالو
ځواکونو لوی درستیزان به په دې غونډه کې ګډون وکړي.
پاکستان، سعودي عربستان او ترکیې د اګسټ په اوومه په مکه کې د ګډ دفاعي تړون لاسلیک کړ. د تړون د لاسلیک پر
مهال د پاکستان لومړي وزیر شهباز شریف، د سعودي عربستان ولیعهد او لومړي وزیر محمد
بن سلمان او د ترکیې ولسمشر رجب طیب اردوغان حضور درلود.
د دغه تړون له مخې، پر یوه هېواد هر ډول وسلهوال برید به پر ټولو
درېیو هېوادونو د برید په توګه ګڼل کېږي. دغه اصل د ناټو د ګډې دفاع له پنځمې مادې
سره ورته والی لري.
د ترکیې د بهرنیو چارو وزارت چارواکي ویلي چې نړیوال امنیتي مسایل به
د غونډې د اجنډا په سر کې وي.
تمه ده په دې غونډه کې د درېیو هېوادونو د دفاعي وړتیاوو پر پیاوړتیا،
د وسلهوالو ځواکونو ترمنځ د همغږۍ او ګډو عملیاتو پر پراختیا او د دفاعي صنعت په
برخه کې د ګډو پروژو، تولید او ټکنالوژۍ د پراختیا پر موضوعاتو خبرې وشي.
دغه غونډه په داسې مهال ترسره کېږي چې په منځني ختیځ کې د امنیتي
وضعیت د خرابېدو له امله سیمهییز هېوادونه هڅه کوي خپلې دفاعي او امنیتي اړیکې
پراخې کړي.
ترکیې ویلي چې دغه دفاعي تړون د کوم ځانګړي هېواد پر ضد نه دی او د
سیمې د نورو هېوادونو پر مخ هم د ګډون لپاره پرانیستی دی. د ترکیې ولسمشر رجب طیب
اردوغان مخکې ویلي وو چې تړون د سولې، سوکالۍ او سیمهییز ثبات د ملاتړ لپاره جوړ
شوی دی.
مصر د دغه دفاعي چوکاټ د احتمالي پراختیا لپاره د یوه نوماند هېواد په
توګه یاد شوی، خو تر اوسه د دغه هېواد د رسمي ګډون پرېکړه نه ده شوې.
ترکیې ټینګار کړی چې نوی دفاعي تړون د ناټو او نورو موجوده امنیتي
ائتلافونو د ځای ناستي په توګه نه دی جوړ شوی.
د «ډان» د راپور له مخې، د دوشنبې د ورځې غونډه به د تړون د عملي کولو
لپاره د ګډو میکانیزمونو پر رامنځته کولو او د پاکستان، سعودي عربستان او ترکیې
ترمنځ د پوځي او دفاعي صنعت د همکاریو پر پراخولو تمرکز وکړي.
