د پاکستان د مخالفو ګوندونو مشر محمود خان اڅکزی وايي، امریکا او روسیې افغانستان د جګړې پر مرکز بدل کړی او په دغه هېواد کې یې د ترهګرۍ د پراختیا زمینه برابره کړې ده.
اڅکزي ویلي، امریکا، روسیه او د دغو دواړو هېوادونو متحدان د
افغانستان د ویجاړۍ مسوول دي.
نوموړي د افغانستان د روان وضعیت په اړه د ملګرو ملتونو او د شانګهای
همکاریو سازمان د جدي پاملرنې غوښتنه کړې او له دواړو بنسټونو یې غوښتي چې په
افغانستان کې روان وضعیت د یوه بشري ناورین په توګه په رسمیت وپېژني.
اڅکزي ویلي، په داسې حال کې چې د شانګهای همکاریو سازمان په خپله
راتلونکې غونډه کې د افغانستان پر وضعیت خبرې کوي، په دې غونډه کې د افغانستان د
«رښتینو استازو» نشتون د اندېښنې وړ دی.
هغه ټینګار کړی چې د افغانستان په اړه هر ډول بحث باید د افغانانو د
نظرونو او د دغه هېواد د خلکو د واقعي استازیتوب له شتون پرته ترسره نه شي.
اڅکزي له نړیوالې ټولنې غوښتي چې په افغانستان کې روان بشري او امنیتي
وضعیت جدي وڅاري او د افغانانو د ستونزو د هواري لپاره عملي اقدامات وکړي.
