کابلټریبیون (کېټي)—ایراني چارواکي وايي د امریکا له بریدونو وروسته یې د هرمز تنګي ته څېرمه پر ۱۰ بېړیو بریدونه کړي دي.
د چارواکو په وینا، وروسته
له هغې چې د امریکا په بریدونو کې د دغه هېواد پنځه د تېلو ټانکرونه ډوب شول،
ایراني ځواکونو د هرمز تنګي ته نږدې پر ۱۰ بېړیو بریدونه کړي دي.
د راپورونو له مخې، دغه بریدونه د جګړې له پیل راهیسې په تېرو شپږو
میاشتو کې پر سمندري بېړیو د دواړو لورو د متقابلو بریدونو تر ټولو پراخه څپه بلل
شوې ده.
د دغو بریدونو له امله په نړیوالو بازارونو کې د تېلو بیې هم لوړې شوې
دي. د برنټ خام تېلو د راتلونکو قراردادونو بیه د لومړي ځل لپاره له جولای میاشتې
راهیسې له ۱۰۰ ډالرو پر
بېرل څخه لوړه شوې ده.
په ورته مهال، په دغو پېښو کې لږ تر لږه یو سمندري کارکوونکی وژل شوی
او یو بل کس وروسته له هغې نادرکه شوی چې پر یوې د تېلو وړونکې بېړۍ برید شوی دی.
د هرمز تنګی د نړۍ د تېلو د لېږد له مهمو سمندري لارو څخه دی او هر
ډول ناامني په دغه سیمه کې کولی شي د نړیوالو بازارونو پر تېلو بیو او اکمالاتو
اغېز وکړي.
