کابلټریبیون (کېټي)— د طالبانو د دفاع وزارت د سرمفتش تورن جنرال لطیفالله حکیمي په مشرۍ د دغه وزارت یو لوړپوړی پلاوی د چین په ۱۳م شیانګشان نړیوال فورم کې د ګډون لپاره بیجینګ ته تللی دی.
د طالبانو دفاع وزارت ویلي، حکیمي به په دغه نړیوال فورم کې د
افغانستان په استازیتوب وینا وکړي او د بېلابېلو هېوادونو له لوړپوړو پلاوو سره به
په لیدنو کې پر اړوندو موضوعاتو خبرې وکړي.
د شیانګشان نړیوال فورم د امنیتي او دفاعي مسایلو په اړه د چین له
مهمو نړیوالو ناستو څخه دی چې د بېلابېلو هېوادونو لوړپوړي پوځي او دفاعي چارواکي
په کې ګډون کوي.
د طالبانو د دفاع وزارت د پلاوي سفر داسې مهال ترسره کېږي چې چین له
طالبانو سره پراخې سیاسي او اقتصادي اړیکې لري، خو لا هم یې د طالبانو حکومت په
رسمي ډول په رسمیت نه دی پېژندلی.
