کابلټریبیون (کېټي) — د خیبر پښتونخوا په کوهاټ کې د جمعې د لمانځه پر مهال د پولیسو د پخوانیو لیکو ته څېرمه په ځانمرګي برید کې د پنځو پولیسو په ګډون ۱۶ کسان وژل شوي دي.
جیونیوز د خیبر
پښتونخوا د پولیسو عمومي پلټونکي ذوالفقار حامد له قوله ویلي، له چاودېدونکو توکو ډک یو موټر د
پولیسو د پخوانیو لیکو له دروازې سره وجنګېد او وروسته وچاودېد.
حامد ویلي، له چاودنې سره هممهاله ډزې هم شوې او د پولیسو او وسلهوالو
ترمنځ نښته رامنځته شوې ده.
د خیبر پښتونخوا د پولیسو مشر زیاته کړې چې د ډزو پر مهال د ځانګړې
څانګې په ودانۍ کې دویمه ځانمرګۍ چاودنه هم شوې ده.
د هغه په وینا، تر اوسه درې وسلهوال له پولیسو سره په نښته کې وژل
شوي دي.
حامد ویلي، د خیبر پښتونخوا پولیس به د وسلهوالو
پر وړاندې خپلې مبارزې ته دوام ورکړي او دا ډول بریدونه به د پولیسو مورال کمزوری
نه کړي.
د کوهاټ د ولسوالۍ مرکزي روغتون طبي مشر طاهر علي شاه جیو نیوز ته
ویلي، له چاودنې وروسته ۱۵ جسدونه او له ۵۰ ډېر ټپیان روغتون ته انتقال شوي وو. د
روغتون ادارې وروسته ویلي چې لږ تر لږه ۲۵ ټپیان د درملنې لپاره روغتون ته وړل شوي
دي.
د ژغورنې ادارې چارواکو ویلي، چاودنې د جومات بهرنۍ برخه سخته زیانمنه
کړې او یو دېوال هم نړېدلی دی. د پېښې په سیمه کې د ژغورنې عملیات روان وو.
چارواکو له پېښې وروسته د کوهاټ ـ هنګو لویه لار د ټرافیک پر مخ تړلې ده. د کوهاټ ولسوالۍ ادارې هم د ټپیانو د درملنې لپاره
په مرکزي روغتون کې بېړنی حالت اعلان کړی دی.
د پاکستان مرکزي پولیس دفتر ویلي، د خیبر پښتونخوا د پولیسو عمومي
پلټونکي له کوهاټ سیمهییز پولیس مشر څخه د پېښې په اړه راپور غوښتی دی.
د مرکزي پولیس دفتر په وینا، چارواکي لا هم د چاودنې د څرنګوالي په
اړه پلټنې کوي او له بریدګرو سره د پولیسو نښته له چاودنې وروسته هم روانه وه.
