کابلټریبیون (کېټي)— د تاجکستان د بهرنیو چارو وزیر سراجالدین مهرالدین وايي، افغانستان سولې، ثبات او اقتصادي فرصتونو ته اړتیا لري او هېواد یې د افغانانو د ملاتړ او له سیمهییزو هېوادونو سره د همکارۍ دوام ته ژمن دی.
مهرالدین دغه څرګندونې د ملګرو ملتونو د عمومي غونډې پر مهال کړې دي.
هغه وویل، تاجکستان به له افغانستان سره خپلو همکاریو ته دوام ورکړي،
څو د یوه سولهییز او باثباته افغانستان په رامنځته کېدو کې مرسته وشي.
د تاجکستان د بهرنیو چارو وزیر وویل، له افغانستان سره د دغه هېواد د
اوږدې پولې تجربه ښيي چې د بحرانونو د مخنیوي او په سیمه کې د ثبات د ټینګښت لپاره
د ګاونډیو هېوادونو ترمنځ همکاري مهمه ده.
مهرالدین زیاته کړه، که تاجکستان د ملګرو ملتونو د امنیت شورا غړیتوب
ترلاسه کړي، نو د یوه داسې هېواد تجربه به له ځان سره ولري چې جګړه یې تجربه کړې،
سولې ته رسېدلی، له جدي سرحدي ستونزو سره مخ شوی او د خبرو اترو او جوړجاړي له
لارې یې د ستونزو د حل هڅه کړې ده.
هغه وویل، خبرې اترې لا هم د تاجکستان د بهرني سیاست او له ګاونډیو
هېوادونو سره د اړیکو له مهمو اصولو څخه دي.
نوموړي د قرغزستان او ازبکستان له حکومتونو سره وروستیو هوکړو ته هم
اشاره وکړه او ویې ویل چې دغو هوکړو د پخوانیو سرحدي اختلافونو په حل کې مرسته کړې
او په منځنۍ اسیا کې یې د سیمهییزې همکارۍ لپاره نوی فرصت رامنځته کړی دی.
د تاجکستان د بهرنیو چارو وزیر دا څرګندونې داسې مهال کوي چې دوشنبه
له اوږدې مودې راهیسې د افغانستان له شمالي سرحدونو څخه د احتمالي امنیتي ګواښونو
په اړه اندېښنې څرګندې کړې دي.
