کابلټریبیون (کېټي)— د پاکستان د پنجاب ایالت په راجنپور ولسوالۍ کې د یوه مسافر وړونکي بس د چپه کېدو پېښې له امله لږ تر لږه ۱۰ کسان وژل شوي او ۳۲ نور ټپیان دي.
د ژغورنې ادارې د چارواکو په وینا، پېښه د چهارشنبې په ورځ د انډس پر
لویه لار، د بنګله هدایت سیمې ته نږدې هغه مهال رامنځته شوه چې یوه تېزرفتاره
مسافر وړونکي بس د سړک له بېلوونکي خنډ سره ټکر وکړ او چپه شو.
د راپورونو له مخې، دغه بس له کراچۍ څخه د ډېره غازي خان پر لور روان
و.
د ژغورنې ډلې له پېښې لږ وروسته سیمې ته رسېدلې او د وژل شویو کسانو
جسدونه او ټپیان یې نږدې روغتونونو ته لېږدولي دي.
د پېښې له امله د راجنپور په مرکزي روغتون او شاوخوا نورو روغتیايي
مرکزونو کې بېړنی حالت اعلان شوی، څو ټپیانو ته پر وخت روغتیايي خدمات وړاندې شي.
