ایران فارس خلیج کې له کیمیاوي محصولاتو د بار بیړۍ نیول تایید کړل

24 لړم 1404 - 20:31

کابل ټربیون_ د رویټرز خبري اژانس راپور ورکړی ایران تایید کړې چې د اسلامي انقلاب ساتونکي پوځ (سپاه) په فارس خلیج کې یوه بېړۍ چې پټروکیمیاوي محصولات یې لېږدول، نیولې ده.

د دغه راپور له مخې چې د شنبې په ورځ (د لړم په ۲۴مه) خپور شوی، نیول شوې بیړۍ چې «تالارا» نومېږي او د مارشال ټاپوګانو له بیرغ سره، له عربي متحده اماراتو د شارجه بندر څخه سينګاپور ته روانه وه.

د ایران دولتي رسنیو له قوله، سپاه ادعا کړې چې دغې بیړۍ «ناقانونه توکي» لېږدول؛ خو د دغې سرغړونې په اړه نور جزئیات نه‌دي ورکړل شوي.

د دغې پېښې په غبرګون کې، د متحده ایالاتو پوځ په یوه اعلامیه کې ویلي چې له دې خبر دي او پرمختګونه «په فعاله توګه» څاري.

دا پېښه د روان کال د جون میاشتې کې د اسراییل له بریدونو وروسته د ایران له خوا د بېړۍ لومړنۍ نیونه ګڼل کېږي.

سپاه په وروستیو کلونو کې څو ځله په فارس خلیج کې سوداګریزې بیړۍ نیولي او معمولاً یې لاملونه تخنیکي سرغړونې، قاچاق یا د سمندري قوانینو نقض ښودلي دي.

وروستۍ ورته پېښه د ۲۰۲۴ کال د اپریل میاشتې پورې اړوندېږي.