کابل تریبون - د پاکستان ولسمشر، اصف علي زرداري، د دوشنبې په ورځ(د کب په ۱۱مه) ویلي چې هېواد یې «هغه جګړه چې د خبرو اترو د روان بهیر پر مهال د ایران پر ضد پیل شوې، په کلکه غندي» او یو ځل بیا یې د اسلاماباد له لوري د هغه څه د حاکمیت او ځمکنۍ بشپړتیا ملاتړ تائید کړ چې نوموړي یې ایران د پاکستان «ورور هېواد» وباله.
زرداري دغه څرګندونې د پاکستان د پارلمان ګډې غونډې ته د وینا پر مهال وکړې او ویې ویل چې اسلاماباد په منځني ختیځ کې وروستیو تحولاتو ته ژوره اندېښنه لري او د زغم، احتیاط او ډیپلوماسۍ له لارې د کړکېچ د سولهییز حل غوښتنه کوي.
نوموړي همدارنګه د خلیج سیمې پر ګاونډیو هېوادونو د ایران غچاخیستونکي بریدونه وغندل او د نړۍوالو قوانینو د رعایت او د هېوادونو د حاکمیت او ځمکنۍ بشپړتیا پر درناوي یې ټینګار وکړ.
د امریکا متحدو ایالتونو او اسراییلو چارواکو تر اوسه د زرداري دغو څرګندونو ته سمدستي غبرګون نهدی ښودلی.
دغه څرګندونې داسې مهال کېږي چې په منځني ختیځ کې ترینګلتیا د امریکا او اسراییلو له لوري پر ایران تر بریدونو او ورپسې د ایران د متقابلو عملیاتو وروسته زیاته شوې ده؛ داسې وضعیت چې د پراخې بېثباتۍ د رامنځته کېدو اندېښنې یې زیاتې کړې او ګڼ هېوادونه یې د تاوتریخوالي کمولو او ډیپلوماټیکو حللارو ته د مخه کولو غوښتنې ته اړ کړي دي.
