په کندهار ولایت کې د طالبانو د امنیې قومندانۍ ویاند اسدالله جمشید تایید کړې چې تېره ورځ یکشنبه یو ټکسي چلوونکی د دغه ولایت د ارغنداب ولسوالۍ په «سرکاري باغ» سیمه کې د یو شمېر کسانو له خوا په چړو وهل شوی او وژل شوی دی.
د نوموړي په وینا، بریدکوونکو دغه کس د مېلې په پلمه او د دوو ښځو په
ملتیا تر یادې سیمې پورې بیولی و، چې هلته یې د هغه تر وژلو وروسته د نوموړي زوی
هم سخت ټپي کړی دی.
جمشید وايي، تر اوسه د یادې پېښې په تړاو څوک نه دي نیول شوي، خو د
عاملینو د پېژندلو او د پېښې د څرنګوالي په اړه پلټنې روانې دي.
دا په داسې حال کې ده چې په وروستیو میاشتو کې په یو شمېر ولایتونو کې
د جنايي پېښو په اړه راپورونه زیات شوي دي.
