رویټرز راپور ورکړی چې د امریکا او ایران ترمنځ ترینګلتیا تر بل هر وخت لوړه شوې، او تهران خبرداری ورکړی چې که فشارونه دوام وکړي، د هرمز تنګی به په بشپړ ډول وتړي.
د راپورونو له مخې، دا کړکېچ وروسته له هغه زیات شو چې امریکايي ځواکونو د عمان په خلیج کې یوه ایراني سوداګریزه کښتۍ ونیوله، هغه کښتۍ چې د ایران په وینا له چین څخه روانه وه. واشنګټن بیا ویلي چې کښتۍ د امریکا له لوري لګول شوی سمندري بندیز ماتولو هڅه کوله.
د ایران سپاه پاسداران د دې پېښې په غبرګون کې خبرداری ورکړی چې دا اقدام به «بېځوابه پاتې نه شي»، او ایراني چارواکو دا پېښه «وسلهواله سمندري غلا» بللې ده.
په همدې حال کې د ایران د ولسمشر لومړي مرستیال، محمدرضا عارف ویلي چې تر هغې چې پر ایران او متحدینو یې اقتصادي او پوځي فشارونه دوام ولري، د هرمز تنګی به تړلی وي. هغه زیاته کړې: «یا به د تېلو بازار د ټولو لپاره ازاد وي، یا به ټول درانه لګښتونه پرې کوي.»
دا پرمختګونه داسې مهال رامنځته کېږي چې نازک اوربند له جدي ګواښ سره مخ شوی او د سولې خبرې هم له ناڅرګند برخلیک سره مخ دي. راپورونه ښيي چې ایران ښايي د خبرو په دویم پړاو کې ګډون ونه کړي، او ایراني رسنیو د امریکا «زیاتې غوښتنې» او بدلېدونکي دریځونه د خبرو د ټکنۍ کېدو لامل بللي دي.
بلخوا، ډونالډ ټرمپ ویلي چې ټاکل شوې د امریکا پلاوی د پاکستان په اسلامآباد کې د خبرو لپاره حاضر شي، خو ګواښ یې کړی که ایران هوکړې ته ونه رسېږي، د هغه هېواد د انرژۍ تاسیسات او پلونه به په نښه کړي. سره له دې، ایراني چارواکو ټینګار کړی چې تر اوسه د دویم پړاو مذاکراتو لپاره کومه ټاکلې نېټه نشته.
په ورته وخت کې، د هرمز تنګي د احتمالي تړل کېدو له امله نړیوال بازارونه هم اغېزمن شوي؛ د تېلو بیې لوړې شوې او د انرژۍ د نړیوال امنیت په اړه اندېښنې زیاتې شوې دي.
دا کړکېچ، چې اوس اتمې اوونۍ ته رسېدلی، د پراخې سیمهییزې جګړې وېره نوره هم زیاته کړې، په داسې حال کې چې د اوربند راتلونکی او د ډیپلوماتیکو هڅو بریالیتوب لا هم تر پوښتنې لاندې دی.
