طالبانو رئیسالوزرا ټولو دولتي ادارو او ولایتونو ته نوی حکم کړی چې له دې وروسته، د کابل په ګډون په ټولو ولایتونو کې خلکو ته د یو لړ مشخصو اسنادو او تاییدونو وروسته د ودانیو او کورونو د جوړولو اجازه ورکړل شي.
د دغه حکم له مخې، هغه کسان چې غواړي کورونه جوړ کړي، باید شرعي
قباله، د مالیې اسناد، د معاملې سند (رهنما یا عرفي سند) او د جومات د امام تایید
ولري، څو ښاروالۍ ورته د جوړولو اجازه ورکړي.
په خبرپاڼه کې ویل شوي چې امنیتي ځواکونو ته سپارښتنه شوې چې په دې
برخه کې دې خلکو ته ستونزې نه جوړوي. همدارنګه د ځمکو اړوند ادارو ته دنده سپارل
شوې چې د یوې میاشتې په موده کې د ځمکو نقشې ښاروالیو ته وسپاري.
د طالبانو د لارښوونې له مخې، ښاروالۍ باید په همدې موده کې هغه سیمې
مشخصې کړي چې سیلابي، تاریخي یا د ښار جوړونې له نظره ممنوعه دي، څو د کورونو
جوړول پکې محدود شي.
دغه حکم په ځانګړي ډول د لویو ښارونو، په تېره بیا کابل، لپاره دی، او
پکې ویل شوي چې هغه کسان چې غواړي کورونه جوړ کړي، باید شرعي قباله ولري، مالیه یې
ورکړې وي، د معاملې اسناد او عرفي سند ولري او همدارنګه د جومات د امام، دوه
ګاونډیانو او د محل د وکیل له خوا تایید هم ترلاسه کړي، تر څو وکولای شي د کور
جوړولو اجازه واخلي.
دا په داسې حال کې ده چې په وروستیو کلونو کې د ښارونو پراخېدل،
غیرمنظمې ودانۍ او د ځمکو د ملکیت شخړې زیاتې شوې، او ډېری خلک د رسمي اسنادو د
نشتوالي له امله د کور جوړولو له ستونزو سره مخ وو.
