د طالبانو د عامې روغتیا وزیر مولوي نور جلال جلالي بلخ ولایت ته د سفر پر مهال د ازبکستان د عامې روغتیا له وزیر اسیلبیک خدایاروف سره د دواړو هېوادونو ترمنځ د روغتیايي همکاریو په اړه خبرې کړې دي.
د طالبانو د عامې روغتیا وزارت په یوه خبرپاڼه کې ویلي، دواړو لورو د
بلخ ولایت مقام کې د یوې ناستې پر مهال د روغتیايي متخصصینو د ظرفیت لوړولو، د
هیموفیلیا ناروغانو د درملنې، د ناروغانو لپاره د ویزو د اسانتیاوو برابرولو، د
خوړو او درملو د کیفیت د کنټرول او د روغتونونو لپاره د طبي تجهیزاتو د برابرولو
په اړه خبرې کړې دي.
په خبرپاڼه کې راغلي چې دواړو لورو یو بل ته د همکارۍ ډاډ ورکړی دی.
همدارنګه، جلالي ازبکستاني شرکتونو ته په افغانستان کې د درملو د
تولید په برخه کې د پانګونې بلنه ورکړې ده.
طالبان هڅه کوي د ګاونډیو هېوادونو سره په بېلابېلو برخو، په ځانګړي
ډول روغتیايي سکتور کې، خپلې اړیکې پیاوړې کړي. د درملو تولید، د طبي تجهیزاتو
برابرول او د روغتیايي کارکوونکو روزنه هغه مهمې برخې دي چې د بهرنیو همکاریو له
لارې یې د پیاوړتیا هڅې روانې دي.
