قطر ټریبیون راپور ورکړی چې د قطر د بهرنیو چارو وزارت د دولت وزیر ډاکټر محمد بن عبدالعزیز بن صالح الخليفي د پنجشنبې په ورځ (د ۱۴۰۵ کال د غویي ۲۵مه) په دوحه کې د افغانستان لپاره د چین له ځانګړي استازي یو شیاویونګ سره لیدلي دي.
په دې کتنه کې دواړو لورو د افغانستان پر وروستیو پرمختګونو خبرې وکړې او د هېواد د امنیت او ثبات د ټینګښت لپاره یې د ګډو نړیوالو هڅو د پیاوړتیا لارې چارې وڅېړلې.
الخليفي د شخړو د سولهییز حل لپاره د نوښتونو په ملاتړ د قطر بشپړ ژمنتیا بیا تازه کړه او د سیمې او نړۍ په کچه د سولې او ثبات د پیاوړتیا پر اهمیت یې ټینګار وکړ.
قطر په تېرو لسو کلونو کې د افغانستان په چارو کې فعاله ډیپلوماټیکه ونډه لرلې، چې له ډلې یې د طالبانو او د امریکا ترمنځ د مهمو خبرو کوربتوب و، کوم چې د دوحې هوکړې ته لاره هواره کړه.
د ۲۰۲۱ کال کې د طالبانو له بیا واک ته رسېدو وروسته، د چین په ګډون سیمهییزو او نړیوالو لوبغاړو له کابل سره خپلې ډیپلوماټیکې اړیکې زیاتې کړې دي، چې تمرکز یې پر ثبات، د ترهګرۍ پر ضد مبارزې او اقتصادي همکاریو دی.
