په هلمند کې د طالبانو امنیه قومنداني وايي، د دغه ولایت د خانشین ولسوالۍ په کلا سبز کلي کې د یوې ناچاودې مرمۍ د چاودنې له امله دوه کوچنیان وژل شوي او د هغوی مور سخته ټپي شوې ده.
د طالبانو د هلمند امنیه قومندانۍ په وینا، دغه پېښه نن (چهارشنبه)
شاوخوا د سهار نهه بجې هغه مهال رامنځته شوه، کله چې ناچاوده مرمۍ په یوه کور کې
اور ته واچول شوه.
د سرچینې د معلوماتو له مخې، په دې چاودنه کې د ۱۰ او ۳ کلونو په عمر
دوه کوچنیان وژل شوي دي.
چارواکو ویلي، ټپي شوې مېرمن د درملنې لپاره روغتون ته لېږدول شوې ده.
په افغانستان کې د تېرو جګړو پاتې ناچاوده توکي لا هم د ملکي وګړو، په
ځانګړي ډول ماشومانو لپاره جدي ګواښ بلل کېږي. ډېری دا ډول پېښې هغه مهال رامنځته
کېږي، کله چې خلک د ناچاودو مرمیو له خطره ناخبره وي او ورسره ناسم چلند وکړي.
