د پاکستان په بندخونو کې د افغان کډوالو د نیولو په دوام، د طالبانو د کډوالو او راستنېدونکو چارو وزارت وايي، ۷۹ افغانان له زندانونو خوشې شوي او هېواد ته راستانه شوي دي.
د دغه وزارت د معلوماتو له مخې، یاد کسان له خوشې کېدو وروسته د
ننګرهار د تورخم له لارې افغانستان ته راستانه شوي دي.
په خبرپاڼه کې د طالبانو د ننګرهار د کډوالو
چارو ریاست د لېږد امریت د مسوولینو په حواله ویل شوي، چې په دغو کسانو کې کورنۍ
او انفرادي وګړي شامل دي.
سرچینې زیاته کړې، چې یاد افغانان د استوګنې د اسنادو د ستونزو له
امله نیول شوي وو او د بند بېلابېلې مودې یې تېرې کړې وې.
د کډوالو او راستنېدونکو چارو وزارت ویلي، چې راخوشې شوي کسان تر ثبت
او د لومړنیو مرستو له ترلاسه کولو وروسته خپلو سیمو ته لېږدول شوي دي.
یاد وزارت ټینګار کړی، چې د راستانه شویو کډوالو د ستونزو د حل او
اسانتیاوو د برابرولو لپاره له اړوندو بنسټونو سره په همغږۍ هڅې روانې دي.
د یادونې ده، چې تر دې وړاندې هم د پاکستان له بندخونو سلګونه افغانان
خوشې شوي او بېرته هېواد ته راستانه شوي وو.
