په ایران کې د یوې ترافیکي پېښې له امله شپږ افغان کډوال مړه شوي او درې نور ټپیان دي، د ایراني رسنیو راپور ورکړی دی.
د راپورونو له مخې، دا پېښه د ۱۴۰۴ لمریز کال د غبرګولي په ۱۴مه، د پنجشنبې په ماښام د
سمنان ښار اړوند د ایوانکي–شریفآباد پر لویه لاره رامنځته شوې، چېرته چې یو پژو ۴۰۵ موټر له یوې
لارۍ سره ټکر کړی دی.
د ژغورنې مسوولینو ویلي، چې د پېښې له راپور ترلاسه کولو وروسته د
بیړنیو مرستو ټیمونه سیمې ته واستول شول او د ژغورنې عملیات یې پیل کړل. ټپیان د
درملنې لپاره نږدې روغتیايي مرکزونو ته لېږدول شوي دي.
د سمنان د سرې میاشتې ټولنې مشر هم تأیید کړې، چې د دې پېښې قربانیان د
افغانستان اتباع وو.
ایراني چارواکو ویلي، چې د پېښې اصلي لامل لا تر اوسه نه دی روښانه شوی
او په دې اړه څېړنې روانې دي.
هر کال په ایران کې سلګونه افغان کډوال د ترافیکي پېښو، کاري حوادثو او
یا هم د ښارونو ترمنځ د تګ راتګ پر مهال خپل ژوند له لاسه ورکوي. کارپوهان د
سړکونو د پېښو د زیاتوالي یو لامل د ترافیکو ګڼهګوڼه، غیرمجاز سرعت او د ځینو
وسایطو زړښت بولي.
د سمنان ولایت د تهران او مشهد ترمنځ پر اصلي لاره پروت دی او د ایران
له ګڼېګوڼې ډکو سړکونو څخه ګڼل کېږي.
