په فراه کې د طالبانو امنیه قومنداني وایي، د دغه ولایت د مرکز فراه ښار په زمان کلا سیمه کې د یوې ترافیکي پېښې له امله یو کس وژل شوی او څلور نور ټپیان شوي دي.
د یادې قومندانۍ په وینا، دغه پېښه نن (دوشنبه) د دوو رکشو ترمنځ د ټکر
له امله رامنځته شوې او لامل یې د موټر چلوونکو بېاحتیاطي بلل شوې ده.
سرچینه زیاتوي، چې ټپیان د درملنې لپاره روغتون ته لېږدول شوي، چې په
منځ کې یې یوه ښځه هم شامله ده.
دا په داسې حال کې ده، چې په وروستیو کې د هېواد په بېلابېلو ولایتونو
کې د ترافیکي پېښو شمېر زیات شوی، چې ډېری یې د بېاحتیاطۍ، د ترافیکي اصولو نه
مراعت او د سړکونو د خراب وضعیت له امله رامنځته کېږي.
