د طالبانو د کډوالو او راستنېدونکو چارو وزارت ویلي چې په پاکستان کې د افغان کډوالو د نیولو په دوام، تازه ۴۸۵ افغان بندیان له بندخونو ازاد او افغانستان ته راستانه شوي دي.
د دغه وزارت د خبرپاڼې له مخې، یاد کسان د استوګنې اسنادو د ستونزو له
امله نیول شوي وو او د پاکستان په بندخونو کې یې بېلابېل وختونه تېر کړي دي.
سرچینې زیاته کړې چې له دې ډلې ۴۷۵ کسان د تورخم او ۲۸ تنه د سپینبولدک له لارې هېواد ته
راستانه شوي، چې تر اړینو مرستو او ملاتړ وروسته خپلو اصلي سیمو ته لېږدول شوي دي.
د طالبانو د کډوالو چارو وزارت له نړیوالو بنسټونو غوښتي چې د کډوالو
ملاتړ، اسانه راستنېدنه او د راستنېدونکو لپاره د خوندي او انساني چاپېریال
برابرولو ته دوام ورکړي.
په وروستیو کلونو کې په پاکستان کې د افغان کډوالو د نیولو او ځورولو
پېښې زیاتې شوې دي، او څو ځله سلګونه افغانان له بندخونو ازاد او بېرته خپل هېواد
ته راستانه شوي دي.
له بلې خوا، له ګاونډیو
هېوادونو څخه د افغان کډوالو د جبري ایستلو بهیر هم چټک شوی، چې یوازې پرون
(چهارشنبه) له درېنیم زرو ډېر افغانان له پاکستانه ایستل شوي دي.
