د افغانستان د سوداګرۍ او پانګونې خونه وايي، افغان خصوصي سکټور له چین سره د ۳۰ میلیونه امریکايي ډالرو په ارزښت د صنعتي او تولیدي ماشینرۍ د پېرلو شپږ سوداګریز هوکړهلیکونه لاسلیک کړي دي.
یادې خونې ویلي، دغه هوکړهلیکونه د چین د چنګدو ښار د تولیدي او
صنعتي ماشینآلاتو په نړیوال نندارتون کې د افغان پلاوي د ګډون پر مهال د
افغانستان او چین د خصوصي سکټورونو ترمنځ لاسلیک شوي دي.
د خونې په وینا، د افغان پلاوي مشري د مدیره پلاوي غړي عبدالله رحیمي
کوله. نوموړي او ورسره پلاوي د نندارتون په څنډه کې له چینایي چارواکو او سوداګرو
سره د افغانستان د اړتیا وړ ماشینرۍ، د هغو د لېږد او د دواړو هېوادونو ترمنځ د
سوداګریزو همکاریو د پراختیا پر فرصتونو هم خبرې کړې دي.
د افغانستان د سوداګرۍ او پانګونې خونې ویلي، د دغو هوکړهلیکونو موخه
هېواد ته د معیاري صنعتي ماشینرۍ برابرول او د خصوصي سکټور د تولیدي ظرفیت لوړول
دي.
د یادونې وړ ده چې په وروستیو کلونو کې د افغانستان او چین ترمنځ
اقتصادي او سوداګریزې اړیکې پراخې شوې دي. چین د افغانستان له مهمو سوداګریزو
شریکانو څخه شمېرل کېږي او دواړه هېوادونه د سوداګرۍ، پانګونې او صنعتي همکاریو د
پراختیا لپاره هڅې کوي.
