د طالبانو د کډوالو او بېرته راستنېدونکو چارو وزارت وايي، د روانې اوونۍ په ترڅ کې د پاکستان له زندانونو څخه ۱۰۹۹ افغان بندیان ازاد شوي او افغانستان ته راستانه شوي دي.
د وزارت په خبرپاڼه کې راغلي، چې دغه افغانان په پاکستان کې د قانوني
اسنادو د نه لرلو له امله نیول شوي وو. د سرچینې په وینا، هغوی تر ازادېدو وروسته
د سپینبولدک ـ چمن او تورخم له لارو هېواد ته راستانه او خپلو اصلي سیمو ته
لېږدول شوي دي.
د یادونې وړ ده، چې تېره اوونۍ هم د پاکستان له زندانونو څخه ۱۴۱۶ افغان بندیان ازاد او افغانستان ته راستانه شوي وو.
په وروستیو میاشتو کې پاکستان د افغان کډوالو د نیولو، ایستلو او
بېرته ستنولو لړۍ چټکه کړې، چې له امله یې هره ورځ سلګونه افغانان له دغه هېواده افغانستان
ته راستنېږي.
