د ازبکستان د لومړي وزیر مرستیال جمشید خواجهیوف ویلي چې هېواد یې چمتو دی له افغانستان څخه ۱۰۰ زره مټریک ټنه پنبه وارد کړي.
د ازبکستاني چارواکو په وینا، خواجهیوف دا څرګندونې د ۱۴۰۵ کال د
زمري په ۴مه، دوشنبه، په کابل کې د امارتي شرکتونو عمومي رئیس احمدجان بلال سره په
لیدنه کې کړې دي.
هغه ویلي چې ازبکستان له افغانستان سره د اصلاح شویو کرنیزو تخمونو او
کیمیاوي سرو په برخه کې همکارۍ ته هم چمتو دی.
د خواجهیوف په وینا، د راغلي ازبک پلاوي له ډلې یو ټیم به په کابل کې
پاتې شي، څو له افغان چارواکو او سوداګرو سره له افغانستان څخه د تازه مېوو د
صادراتو په اړه خبرې وکړي.
همداراز، نوموړي د طالبانو د کرنې، اوبو لګولو او مالدارۍ له سرپرست
وزیر عطاءالله عمري سره په لیدنه کې ویلي چې ازبکستان د افغانستان کرنیزو
محصولاتو، په ځانګړي ډول پنبې، کچالو او نورو توکو ته اړتیا لري او غواړي د دغو
محصولاتو د تولید او پروسس په برخه کې له افغانستان سره ګډې همکارۍ پراخې کړي.
دواړو لورو د کرنیزو همکاریو د پراختیا لپاره د ګډو کمېټو پر جوړولو
هم هوکړه کړې ده.
