د طالبانو د نیمروز امنیه قومندانۍ وايي، د دغه ولایت د مرکز زرنج ښار د شصت سړک په سیمه کې نامعلومه وسله والو کسانو پر څلورو کسانو ډزې کړې، چې د قومي مشر عبدالخالق نورزي او د هغه د وراره په ګډون دوه تنه وژل شوي او دوه نور ژوبل دي.
د سرچینې په وینا، دا پېښه تېره ورځ (دوشنبه، د زمري ۵مه) رامنځته شوې
او د لامل او انګېزې په اړه یې څېړنې روانې دي.
په وروستیو میاشتو کې د افغانستان په بېلابېلو ولایتونو، په ځانګړې
توګه نیمروز کې، د نامعلومه وسله والو له لوري د هدفي بریدونو او وسله والو پېښو
راپورونه ورکړل شوي دي.
که څه هم طالبانو ویلي چې د هېواد امنیت یې تأمین کړی، خو وخت ناوخت د
ورته بریدونو او مرګونو پېښو راپورونه لا هم خپرېږي.
